[韓流快報] 來韓留學須知 - K-Star HK

Breaking

K-Star HK - 香港韓娛媒體 / KPOP Media From HK .

17.2.14

[韓流快報] 來韓留學須知

140217 [日常] 來韓留學須知



  因應太多人單獨走黎問我實際上點樣先可以黎到韓國呢到讀書/留學,亦都見好似冇咩香港人打呢類相關資料((多數都係台灣人同內地人打)), 於是就決定好用心咁將所有特別須知打晒出黎,煩請用心睇晒佢,真係睇晒諗唔明就留CM俾我啦 ~~
!!2017年4月18日更新!!
以下內容如要轉載,請註明出處。
圖為高麗大學其中一幢建築物
  首先,本人再一次強調, 我依家所讀既只係大學入面附屬既語言學堂, 所學只係純韓文, 唔算係大學生。好啦,依家開始介紹......

1) 揀學校

有人問我點先揀到你心儀既學校, 用啲咩準則去揀,...........呃, 其實呢啲好睇你自己個人想要啲咩....

當初我揀高麗大學, 只不過係因為有朋友會一齊黎, 有個伴起碼爸爸媽媽佢地會安心啲, 同埋聽講高麗大啲老師好好人, 功課量適中, 加上上網睇到學校既環境幾吸引, 所以我揀咗高麗大。

邊啲學校著重教啲咩, 學校學啲咩我就唔多講啦, 因為我只係讀緊一間學校, 冇得比較。 如果你係想知你果間學校係點, 你不妨上佢地既官網睇, 有啲都會有中文介面, 冇既都有英文, 唔洗驚睇唔明。

2) 入學條件

其實呢啲資料學校官網上已經有, 不過值得留意既係, 我地要睇既係一般外國人既入學條件, 而唔係中國人果欄, 同埋上面寫既身元擔保證書係唔洗理既, 只要你有足夠既存款證明就得。

入學基本所需資料如下: 
((不同學校既需要可能會有稍微不同, 請自行看請楚自己心儀學校的要求))



  • (1) 申请書(可以係學校語學堂官網上Download)
  • (2) 最终學歷證明或者在讀證明(原件,用中學畢業證書都得)[部份學校可以用副本代替,請自行查詢]
  • (3) 護照 (COPY)
  • (4) 照片 2張(3x4cm 彩色照片 [部份學校有規定埋背景顏色]
  • (5) 因簽証需要入學通知書的學生,需要提交銀行存款證明(3000 --> 9000美元以上), 銀行存款證明可到銀行前往索取, 如果係用屋企人既戶口證明, 需提交親屬關係證明。
  • [以下新增] (6) 依家我見有啲學校係規定一定要買保險, 係提交申請表時要出示埋保險證明, 至於保險有冇規定要咩類型, 間間學校可能唔同, 請自行EMAIL佢地查詢。
  • (7) 首期學費匯款, 先向學校詢問戶口詳情, 然後就直接到銀行匯款, 首期係要注册費+學期費用咁比, 如果你決定咗讀幾個學期既話, 係可以一次過交埋之後果幾個學期, 同埋申請D4簽證既話你都係要一次過報至少兩個學期以上, 先可以申請到, 如果讀完幾個學期後想再讀, 可以到時候係當地再交學費, 到時候就只需要交學費得唔洗再交册費, D4就到時候再係領事館到延期。


如果你對你心儀學校既要求有唔明, 不妨去EMAIL佢地, 你可以用中文/英文問, 佢地會用返中文/英文回你。(以我所知梨大同高大都附有中文回覆服務)

3) 課程與費用

如果你話你對韓文其他係一竅不通/擔心要韓文 topik試要有3/4級先可以黎到讀, 咁你就錯了。
依家呢個課程係要你學韓文嘛, 唔係要你讀大學啲野, 所以就算你咩都唔識你都係可以黎讀, 簡單啲講, 你有錢就咩都搞得掂, 係咁現實架啦-.-

呢個課程叫 『語言常規課程』, 一年四季 春, 夏, 秋, 冬都可以開學, 分1-6級 (另附有研究班)。

一個學期大約讀3個月, 每個學期費用大約1萬2 港幣((未計住同食)), 部份學校下午班會平啲~

[[都係果句, 實際費用同開課日期請向你心儀學校查詢, 因為真係間間都有唔同]]

如果你真係一粒字都唔識, 唔洗擔心架, 由一級讀起,冇問題的。((當年我就係咩都唔識走去讀)) :P

4) 住宿及基本生活費

又有好多人問我住宿果到點, 大約幾錢.....其實呢啲有平有貴, 都係果句視乎你要求啲咩。

係韓國, 一般有幾種宿舍可以揀 學校宿舍, 寄宿家庭, 考試院等, 費用由$2500-$8000以上都有, 條件愈好,價錢當然愈貴, 部分要先付巨額保證金, 而且除咗寄宿家庭外, 基本上都唔會包埋你食, 唔識煮/懶得煮既話, 杯麵會係你既好伴侶。

以我住緊 以前住過果既果幾間為例, 每月4000蚊左右2500-4000蚊左右既考試院都住過, 有獨廁所 ((平既冇啦)) , 有得上網同用WIFI, 提供基本食材(飯,麵,水, 泡茶....有啲貴啲咪提供多樣化啲既食材), 有時候特別節日/管理員心情好, 宿舍管理員會親自下廚免費有一餐食, 一般位置我簡既都係距離學校和地鐵站大約 10分鐘路程((行路))。

基本上, 房除咗有啲細, 空氣唔係好流通((如果你間房冇對外既窗的話)),同埋如果你果間比較多歐美人時會有機會嘈到你訓唔到之外, 呢個價錢, 我就接受到啦。

至於生活費, 其實你唔出街既話, 放學後都係返去食宿舍所提供既野既話, 基本上唔洗用錢.... 好認真, 啲錢係睇你自己點洗姐, 冇錢咪用少啲, 一餐食10蚊左右既其實都搞得掂((我啦~~因人而異)), 所以真係唔好問我一個月生活費大約係幾多...我唔識答, 因為每個人消費都唔同。

5) 簽證

1.簽證申請地點:大韓民國駐香港總領事館
o 地址:5/F Far East Finance Centre 16 Harcourt Road, Admiralty,Hong Kong 
香港金鐘夏慤道 16號 遠東金融中心 5樓 
o 電話:+852-2862-1580,2862-1581, 2529-4141
e-Mail:hkg-visa@mofa.go.kr
 ※ 查詢簽證相關問題時,須通知簽證申請者的“訪問目的,逗留期限,國籍(所持護照)”

2.簽證申請及領取時間
簽證申請
09:00~12:00(工作日)
※ 必須于早上11:30之前總領事館能申請簽證
領取時間
09:00~12:00, 13:30~16:30(工作日)
3.簽證審查時間及處理程序
o 簽證審查所需時間:5個工作日(持有篩證發給認定號碼僅需要1~2個工作日)
 若需補充材料或核實材料真僞,審查時間將會有所延長,因此申請時必須備妥一切所需文件
o 處理程序
— 申請:填寫簽證申請表及具備所需文件後遞交
 通過代理人申請時,填寫授權書(簽證申請表後面)後遞交
— 查:核實遞交文件的有效性及根據韓國訪問目的所需文件的妥當性驗證等
— 簽發:簽證申請者本人或申請簽證的代理人攜帶申請簽證時收到的‘收據’及本人的身份證到總領事館領取簽證
 攜帶該‘收據’,必須申請簽證本人到總領事館親身領取簽證


4. 提交資料
持特區護照可以免簽90日, 所以你報讀一個學期既話, 可以唔洗申請.

報讀兩個學期以上就要申請D-4簽證。所需如下:-韓國學校入學通知
-現金: $400  --> $480


-韓國學校入學收據 
-最近3果月自己/父母銀行存款証明(最少hkd$20,000以上)
(如用父母既證明, 請準備出世紙副本)
-其他護照, 相片, 身份證, AL/DSE/中學畢業證書副本

官網詳情----> http://hkg.mofa.go.kr/english/as/hkg/visa/issuance/index.jsp

6) 出路

其實呢....出路呢啲我就講唔出架啦.......大家點解唔先諗下自己點解會想讀呢個課程呢??
講真, 讀呢個課程, 有人係為咗可以係韓國到打工, 有人係為咗可以係韓國大學到讀書, 有人只係黎玩, 有人只係黎體驗.....

都係果句, 最緊要係你想要啲咩, 你想點?? 如果你地只係見到我追星好似追得好過癮咁, 我會真係只可以講句, 「請你諗清楚先。」

追星只係我讀韓文以外既其中一個((其實可以話係唯一...因為我冇咩其他嗜好))課餘活動。

學一種語言, 你有興趣,就算幾難幾辛苦, 你都會想繼續學, 呢啲叫趣味。
如果你係冇興趣, 只係隨波逐流, 學多一兩句就想放棄,呢啲叫攞苦上身。

施主們, 諗清楚, 睇真啲, 先好再決定。
有問題就留CM啦~~~有機會既話會打下我在韓國的趣聞。BYE~

39 comments:

  1. 補充:
    其實讀兩個學期以上都未必需要申請簽證,
    因為香港90日免簽, 1個學期1個學期禁報其實可以吳洗搞VISA, 當然1個學期後你需要番香港1次禁樣
    同埋有VISA可以搞外國人登錄證,
    外國人登錄證有咩用?
    好有用, 因為韓國上網買野好多時都需要外國人登錄證先搞到
    所以, 搞吳搞VISA因人而異 ^-^

    ReplyDelete
    Replies
    1. 我想問系咪1個學期1級同埋讀完語學堂系咪可以就咁考大學:)?

      Delete
    2. 仲有吾記得左>< 保證人系咪韓國既學校幫我揾架ORZ?

      Delete
    3. 1個學期1級,
      考大學的話, 基本上要有TOPIK 3級以上, 當然要睇番你想讀既大學既入學要求
      另外, 語言學堂 係吳包括你考TOPIK, TOPIK要自行報名去考
      至於保證人呢個問題, 我吳識答你, 因為校方冇提過要保證人呢樣野:)

      Delete
    4. 係,一個學期一級, 基本上讀到3級以上就可以考大學, 視乎你想讀果間既大學既要求。
      保證人係要自己搵, 不過你有足夠既財力證明, 就唔洗理咩擔保人/保證人。

      Delete
  2. thanks for the info! 上網真係無咩香港人打呢d資料咁。我打算今年9月去,咁可唔可以係當地打工呀?唔介意既話可唔可以留個wtsapp no.或者wechat咁呢?thanks so much:)

    ReplyDelete
  3. Hi!
    我想下年去高麗讀,好像較少香港人去高麗讀,所以 really thanks for your information!!

    想問下高麗的生活,係唔係較首爾大和延世大多學生活動ga?

    另外想問下你住的考試院係上網租定先定係去到韓國先租ga? 我係男仔,又較高大,擔心太細考試院住得較辛苦。所以仲考慮住宿舍定考試院,同埋幾時找好。

    Thanks a lot!!

    ReplyDelete
    Replies
    1. 我會覺得高大係比首大同延世大多活動啲既,不過我都只係聽人講~
      我果時係SD EMAIL去果間考試院留位先,同佢講邊日會到幾點左右,佢基本都會留俾你, 早一個月左右搵差唔多....我依家呢到都有好多高大既男仔住,所以應該冇咩問題(因人而異)
      我唔住宿舍係因為貴啲(我覺得),同有門禁,仲有要同唔識既人SHARE一間房(兩人一間房),冇咁多自由....

      Delete
  4. 多謝你的資料呀!我希望我的讀書生活可以多元化點同識多點人!
    如果想下年六月讀係咪其實年頭開始報?我見網頁只有deadline 無講幾時開始.....
    聽你咁講我都可以主力找考試院先!

    ReplyDelete
    Replies
    1. 出年6月的話, 申請日期係4月30日截止~

      http://klcc.korea.ac.kr/registration/korea.koreaIntro.action?strIntroMode=001 ((有中文~

      Delete
    2. 謝謝你! 如果可以的話等我報名時再請教你!��

      Delete
    3. 你好呀,我又有想請教呀…
      我想知證書係要交原件,但會不會退還咖?謝謝

      Delete
    4. 當然會退,你到時去返校務處到問佢拎返就得:)

      Delete
  5. 你好牙 我都好想知道有關去韓國留學既野 可唔可以加whatsapp傾 :)

    ReplyDelete
  6. hi,我都有好多關於韓國留學既野問,可以whatspp?..

    ReplyDelete
  7. 麓讀語言常規課程SEND EMAIL 過去大學就得:)?THX

    ReplyDelete
  8. 咁我想問埋簽證要3000USD/以上就OK ?咁姐係都已經PASS左學校資金證明個到?THXX !

    ReplyDelete
    Replies
    1. 學校同申請簽証果到兩邊都要一齊提交證明,我果時係學校果邊就用我自己戶口做證明, 申請簽証時由於最近三個月內既證明有兩個月都唔達標準,所以借咗我呀媽個戶口用黎做證明.

      Delete
  9. 姐係VISA個到要3個月都有3000USD咁樣先得?唔該晒你,明左好多! 阿,不過學校個邊多數要幾多證明?

    ReplyDelete
    Replies
    1. 係. 高麗都係3000USD((每間學校都應該差唔多

      Delete
  10. 你好!我打算下年到韓國留學,你報語學堂時需要交醫療保險的證明嗎?thank you!

    ReplyDelete
    Replies
    1. 高麗大不需要, 其他學校可能要,你到時SD EMAIL向佢地查詢就得:)

      Delete
    2. 謝謝你的回覆^^因為我打算報延世的,但我不明白是要醫療保險或是普通一般旅遊保也可以…如果方便的可以交換line,kaokao談一下嗎?=]thank you!

      Delete
  11. hellooo!
    我將會出年報讀梨花春季語學堂 以家準備報名

    我想問呢 銀行存款證明 USD$5000 係要做幾耐既定期
    梨花個網寫以2個學期為準 咁係咪姐係做半年@@?

    THANKYOUUUU ><!!!!!!!!

    ReplyDelete
    Replies
    1. 以我所知佢要你交既銀行存款證明, 係你拎你最近三個月內既銀行存款證明((每個月都有USD$5000))就得@@

      Delete
  12. Hello,我打算下年報高麗大語學堂,想問問高麗大係咪有包學生醫療保險?因為我見網站寫每位學生都會自動加入醫療保險,咁大約會包啲咩?

    同埋想問你有冇另外再買保險(醫療/海外留學保險)?

    Thank you very much

    ReplyDelete
    Replies
    1. 在學期間會有包,包一般傷風感冒果啲.
      我冇再買其他保險之類既野

      Delete
    2. 唔該晒
      另外想問多一樣野,關於機票
      你係買單程定一年期機票?大約喺邊度會搵到?
      Thank you!!!

      Delete
    3. 一年期,上網買又試過,旅行社訂都試過,我係買時先睇邊個平再決定係邊買

      Delete
  13. 多謝你嘅分享!
    我打算2015年3月去高麗大讀韓文吸regular course, 攞 working holiday visa去~
    我想係學校附近租屋/one room, 你有沒有介紹?
    如果方便的可以交換kaotalk傾談一下嗎?

    ReplyDelete
  14. hello! 你好~
    我想問下你當初申請簽證個陣係咪只需要提交出世紙副本同副本既copy就可以?
    thank you :)

    ReplyDelete
  15. 想問下讀完會唔會有d證書或證明你讀完個d🙈🙈🙈

    ReplyDelete
  16. This comment has been removed by the author.

    ReplyDelete
  17. This comment has been removed by the author.

    ReplyDelete
  18. This comment has been removed by the author.

    ReplyDelete
  19. Nice Information

    I'm very glad if you visit my blog again http://jhonsonpegu.blogspot.co.uk/

    ReplyDelete